" Ghjustizia è verità", a sulidarità in azzione !

Parecchje decine di parsone si sò adduniti stu mercuri sera davant'à u chioscu di a piazza San Niculau in Bastia à a chjama di u cumitatu "Ghjustizia è verità per i nostri",mess'in ballu una settimana fà per urganizà a difesa populare di i ghjòvani sustenitori perseguiti da a ghjustizia francese ind'e l'affare Reims-SCB. I fundatori di u cumitatu anu fattu un puntu di a situazione è un scagnu hè statu mess'in piazza. Parecchje azzione sò previste ind'e settimane à vene, a u scopu di sviluppà una sulidarità attiva nant'à tutta l'isula . Al dillà di ss'affare particulare , u cumitatu si vole un spaziu largu di cuntrastu, di scambii è di dimucrazia "urizzuntale" apertu a tutti, dedicatu à a difesa di u nostru populu di pettu à a radicalisazione di u statu francese ( nova legge "cuntr'à u terrorisimu " aduprata sta settimana ). Tocca à tutti i corsi cuscenti di i periculi liati à un cuntestu di ripressione generalizata à sustene è fà campà sta dimarchja salutaria .