Una delegazione di a LEIA NAZIUNALE era prisente stu mercuri 15 di ghjungnu annant'a piazza San Niculau di Bastia per a terza riunione publica di u culletivu "Ghjustizia è verità per i nostri". I rispunsevuli di u culletivu anu datu l'ultime "nutizie di u fronte" ind'è l'affare Reims-SCB. U scontru tra a famiglia di u ghjòvanu Maxime è u ministru francese di l'internu prevista u 24 di ghjugnu hè stata rimessa à ...u 6 di lugliu, ghjornu di a sintenza di u prucessu di i sustenitori !
Hè statu decisu di purtà e rivindicazione davant'a tutti l'eletti di l'assemblea di Corsica, per via di una muzione prisentata à a prussima sessione di u 23 di ghjungnu da u gruppu Per A Corsica, è d'allargà l'andatura à d'altre dimarchje di stessa natura iniziate ss'ultime settimane, per una mossa glubale un giru à a brama di ghjustizia per i nostri, al dillà di l'affare di i sustenitori. A ogni cumpatriottu corsu, ghjòvanu o anzianu, u culletivu lampa una chjamà fraterna à impegnassi di manera unitaria, pacifica ma diterminata inde sta lotta democratica per i diritti è a dignità di u nostru populu. Di pettu à e logiche ripressive d'istituzione d'essenza culuniale è l'autismu vuluntariu di u putere pariginu , hè più che ora di fà ribombà a voce di un populu corsu cuscente e unitu !